Sargaalkii Faransiiska Ahaa oo loo xilsaaray madax sare oo ka tirsan Al-Shabaab
Number of View: 380Wararka laga helaayo Gobolka Baay ayaa waxay xaqiijinayaan in uu weli uu nool yahay Captain Dennis Alex, ka gadaal markii Dowladda France ay sheegtay inay dileen Ururka Al Shabaab.
Wasaarada Gaashaandhiga ee Dowladda Faransiiska ayaa waxay Sabtidii shalay ay shaacisay in Ururka Al Shabaab ay toogteen Dennis Alex, markii hawl galo fashilmay ay ka geysteen Deegaanka Buula Mareer ee Gobolka Shabeellaha Hoose.
Hadaba wararka maanta laga helaayo Gobolka Baay ayaa waxay sheegayaan in Dennis Alex lala aaday dhinaca Degmada Buur Hakaba ee Gobolka Baay, kadib markii uu fashilmay hawl galadii ay Ciidamada Kumaandooska Faransiiska ku doonayeen inay ku soo furtaan habeenimadii Sabtida ahayd.
Warar madax banaan ayaa waxay sheegayaan in Al Shabaab ay Dennis Alex u xil saartay laba ka mid ah Saraakiisheeda, oo magacyadoodu lagu kala sheegay C/qaadir Kumaandoos iyo Axmed Ramaash.
Wararka ayaa waxay intaasi ku darayaan in labaduba ay xalay ku hoydeen Degmada Buur Hakaba, iyagoo wata baala yiri Ciidan aad u xoogan, oo ay ku doonayaan inay ku difaacaan Sarkaalkaan Faransiiska ah, haddii ay dhacdo in markale lagu soo weeraro.
C/qaadir Kumaandoos wuxuu horey uu uga tirsanaan jiray Saraakiisha Ururkii burburay ee Xisbul Islaam, ee markii dambe ku soo biiray dhinaca Ururka Al Shabaab, waana Sarkaal ku wanaagsan dhinaca dagaal gelinta.
Al Shabaab ayaa waxay tuhunsaneyd in mar uun lagu soo weerari doono inta ay gacanteedu ku heyso Dennis Alex, balse kooxda ayaa waxaa lagu tilmaamay inay tahay mid uu heer sareeyo Sirdoonkeeda.
