Maamulka Kismaayo oo qeybiyay raashin dhan 340 tan oo sarreen ah
Number of View: 259
Maamulka ku-meel-gaarka ah ee magaalada Kismaayo ee xarunta gobolka Jubbada hoose ayaa maanta sarreen dhan 340 tan wuxuu u qeybiyay 10,000 oo qoys oo isugu jira dad danyar ah iyo dad ku soo barakacay magaalada oo ku jira xeryo ku yaalla magaalada.
Maamulka ayaa qeybinta sarreenka waxaa u wakiishay hay’ad aan dowli ahayn oo lagu magacaabo Yagleel.
Macallin Xaashi Cabdiraxmaan Ibraahim oo ah madaxa samafalka maamulka Kismaayo ayaa sheegay in qeybinta sarreenka laga sameeyay 70 xarun, isla markaana qoys kasta oo ka mid ah dadkii ka faa’iideystay deeqda uu helay sarreen ku filan.
Waa gargaarkii ugu horreeyay oo maamulka KMG ahi uu ka qeybiyo magaalada tan iyo markii maleeshiyada al-Shabaab laga saaray magaalada Kismaayo horraantii bishii October.










