Dagaal ka Dhacay Beledweyne iyo Khasaare ka Dhashay
Number of View: 133
Muqdisho:- Wararka naga soo gaaraaya magaalada Beledweyne ee Xarunta gobolka Hiiraan ayaa soo sheegaaya in dagaal geystay khasaare isugu njira dhimasho iyo dhaawac uu habeenimadii xalay ku dhexmaray magaalada Beledweyne Ciidamada Dawladda KMG ah kuwa Ethiopia iyo shabaab oo weerarka soo qaaday.
Dagaalka xoogiis ayaa ka dhashay dhanka galbeed ee magaalada, waxaana soo qaaday dagaalyahano katirsan Al shabaab oo gudaha usoo galay xaafado kamid ah magaalada.
Hubka noocyadiisa kala duwan oo ay kamid yihiin kuwa culus ayaa dagaalka la isku adeegsaday waxaana jirtay casbi xooggan oo soo foodsaartay dadka magaalada ku dhaqan.
Ilaa iyo hadda warar rasmi ah kama soo bixin khasaaraha ka dhashay dagaalka xalay ka dhacay magaalada Beledweyne.
Afhayeenka maamulka gobolka Hiiraan ee Dawladda KMG ah Maxamuud Nuur Caga Joof waxa uu sheegay in ay iska caabiyeen weerar uga yimi dhanka shabaab waxaana uu beeniyey in ay shabaabku gudaha usoo galeen magaalada.
Dhanka khasaaraha waxa uu tilmaamay in ay dileen 4-kamid ahaa dagaalyahanada Al shabaab dhankooda waxa uu sheegay in uusan wax khasaare ah kasoo gaarin dagaalku.
Afhayeenka Al shabaab Abu Muscab oo dagaalka ka hadlay waxa uu sheegtay in ay xalay qabsadeen xaafado kamid ah Beledweyne kadibna dib uga laabteen.
Warar madax banaan oo aan magaalada ka helayno ayaa soo sheegaaya in dagaalkii xalay oo socday muddo ku dhow saacad ay shabaab gudaha ugu galeen xaafado ku yaalla dhanka galbeed ee magaalada.
Xaaladda ayaa saaka deggan dhanka galbeed ee magaalada waxaa ka socda hawlgallo ay wadaan Ciidamada Dawladda KMG ah waxayna sii adkeeyeen bandowgii saarnaa magaalada Beledweyne.
Xafiiska Wararka Muqdisho
